"Izay maharitra vadin'andriana !" ary "Mitabe tsy lanin'ny mamba", "ny firaisan-kina no hery"

Ny "VILLE NOUVELLE MADASUN MIHARY" dia fampivondronana ireo tantsaha mpamokatra manerana ny faritra 23 eto Madagasikara antsoina hoe "Gentlemen Farmers" (18 taona ka hatramin'ny 45 taona) nahavita ny fiofanana nomen'i MADASUN D.I.R.M. ka hikatsaka miaraka ny tombontsoa iombonana.

Aoka ho fantatry ny be sy ny maro fa ny "GENTLEMAN FARMER" dia "Corps de Métier" mitovy lenta amin'ireo asa rehetra toy ny mpampianatra, na mpivarotra na mpitsabo, na mpiasa birao..., ka tsy maintsy izy ireo mandoa latsakemboka (cotisations), mba hiarovana ny vokatra (Assurance Agricole) sy hikarakarana ny fisotroan-drononony (CNaPS) ary entiny hitsaboana ny tenany sy ny ankohonany (OSTIE) 

.Raha ny vina natao (business plan) dia ao anatin'ny folo taona dia ho tompony madiodio ny tany iasàny sy ny trano ipetrahany ny isam-pianakaviana, rehefa nahaloa tsikelikely ny vola nampisamborin'ny Banky azy entiny anantanterahana izany.

Ny tanjona amin'izany dia hampiakatra ny farim-piainan'ny isam-pianakaviana amin'ny alàlan'ny famokarana mahomby izay mampiasa teknolojia vaovao eo amin'ny fambolena sy fiompiana ao anatin'ny fiaraha-monina mirindra sy milamina hanjakan'ny ny fiaraha-miasa am-pirahalahiana sy fifanomezan-tanana.

Ho ezahana mba hananana ambim-bava mahatonga taona ka tsy hisian'ny maintso ahitra intsony fa hanana ny ampy ny fianakaviana rehetra. Tsy maintsy manorina tranom-bokatra ho entina hitehirizana ny vokatra sy ny masomboly ampiasaina ny taona manaraka izy ireo.

Hiezaka koa ny "VILLE NOUVELLE MADASUN MIHARY" hanana fitaovana mifanaraka amin'ny toetr'andro ho ampiasain'ny "Gentlemen Farmers" rehetra, mba hanome azy ireo risim-po hiasa tsara arak'izay tratrany.

Ny ONG MADASUN D.I.R.M. rahateo no mikarakara sy mandrindra ny fandraisana ny vokatra mba hialàna amin'ny mpijirika sy handraisan'ny "Gentlemen Farmer" mivantana ny tombontsoany.

Handeha amin’ny ara-dalàna ny “Ville Nouvelle Madasun Mihary” amin’ny fanatanterahana ny asa miaraka amin’ny banky sy ireo orinasa maro. Anisan’ireny ny fanaovana araka ny tokony ho izy ny taratasin’ny tany eny anivon’ny sampandraharaha misahana izany, ny fangatahana “permis de construire” eny anivon’ny kaominina arahin’ny fanentanana ny mponina mba handoa hetra ara-dalàna ho fampandrosoana ny faritra misy azy.

A.G Madasun DIRM

CR Mahereza